جنگ نیوز
ڈھاکہ/ بنگلہ دیش میں خسرہ کی وبا بدستور شدت اختیار کیے ہوئے ہے، جہاں گزشتہ 24 گھنٹوں کے دوران مزید پانچ بچوں کی موت کے بعد ہلاکتوں کی مجموعی تعداد 666 ہو گئی ہے۔
ڈائریکٹوریٹ جنرل آف ہیلتھ سروسز (DGHS) کے مطابق حالیہ اموات کو خسرہ سے متعلق مشتبہ اموات قرار دیا گیا ہے۔ مارچ کے وسط سے اب تک 93 اموات لیبارٹری ٹیسٹ کے ذریعے خسرہ سے تصدیق شدہ ہیں، جبکہ 573 بچے خسرہ جیسی علامات ظاہر ہونے کے بعد جان کی بازی ہار چکے ہیں۔
محکمہ صحت کے مطابق گزشتہ 24 گھنٹوں میں خسرہ جیسی علامات کے حامل 1,009 نئے مریض ملک بھر کے اسپتالوں میں داخل ہوئے، جبکہ 139 نئے کیسز کی لیبارٹری تصدیق ہوئی، جس سے تصدیق شدہ متاثرین کی تعداد 10,773 تک پہنچ گئی۔
مارچ سے وبا میں اضافے کے بعد بنگلہ دیش میں 89,904 مشتبہ خسرہ کیسز رپورٹ ہو چکے ہیں۔ تصدیق شدہ کیسز کو شامل کرنے پر مجموعی تعداد ایک لاکھ سے تجاوز کر گئی ہے، جسے حالیہ دہائیوں کی بدترین وباؤں میں شمار کیا جا رہا ہے۔
