جنگ نیوز
راشٹریہ سویم سیوک سنگھ (آر ایس ایس) کے سربراہ موہن بھاگوت نے کہا ہے کہ اگرچہ یہ بھارت کا دور ہے، تاہم ملک ابھی "وشو گرو” نہیں بنا کیونکہ اس کے لئے مطلوبہ تیاری اور صلاحیت ابھی مکمل طور پر موجود نہیں۔
ناگپور میں آر ایس ایس کے ایک تربیتی پروگرام کی اختتامی تقریب سے خطاب کرتے ہوئے موہن بھاگوت نے کہا کہ بھارت کو عالمی قیادت کا کردار ادا کرنے کے لئے اپنی قومی صلاحیتوں اور استحکام کو مزید مضبوط بنانا ہوگا۔
تقریب میں موجود صنعت کار کمار منگلم برلا نے مغربی ایشیا میں بڑھتی ہوئی بے یقینی، خام تیل کی قیمتوں میں اضافے، سپلائی چین کے مسائل اور مصنوعی ذہانت (اے آئی) کے بڑھتے اثرات کو بھارت کے لئے اہم چیلنج قرار دیا۔
انہوں نے کہا کہ موجودہ عالمی صورتحال بھارت کے لئے مواقع بھی پیدا کر رہی ہے، تاہم ان سے فائدہ اٹھانے کے لئے قومی استعداد اور لچک کو مزید مضبوط بنانا ضروری ہے۔
موہن بھاگوت نے کہا کہ بھارت کے پاس عالمی سطح پر نمایاں کردار ادا کرنے کا موقع موجود ہے، لیکن اس کے لئے مزید تیاری اور عملی اقدامات کی ضرورت ہے۔
