اظہر حاجنی
نئی دلی/جنگ نیوز
پنڈت بھجن سوپوری کے تیسرے یومِ یاد کے موقع پر نئی دہلی کے کمانی آڈیٹوریم میں روز بھر جاری رہنے والی ایک منفرد موسیقیاتی تقریب منعقد ہوئی، جس میں ملک کے مختلف حصوں سے تعلق رکھنے والے نامور گلوکاروں اور سازندوں نے شرکت کرکے انہیں خراجِ عقیدت پیش کیا۔
تقریب میں کلاسیکی، لوک اور صوفیانہ موسیقی سے وابستہ فنکاروں نے اپنی پرفارمنس کے ذریعے پنڈت بھجن سوپوری کی فنی خدمات کو یاد کیا۔ اس موقع پر موسیقی، رقص، میڈیا اور علمی حلقوں کی متعدد ممتاز شخصیات بھی موجود رہیں۔
سوپوری خاندان کے افراد اور سوپوری صوفیانہ گھرانے کے شاگردوں نے بھی شرکت کی۔ مقررین اور فنکاروں نے پنڈت بھجن سوپوری کو سنتور کو عالمی سطح پر متعارف کرانے، نئی نسل کے فنکاروں کی تربیت کرنے اور ہندوستانی موسیقی کے فروغ میں ان کی گرانقدر خدمات پر خراجِ تحسین پیش کیا۔
معروف سنتور نواز پنڈت ابھیئے رستم سوپوری نے تمام فنکاروں اور شرکاء کا شکریہ ادا کرتے ہوئے کہا کہ یہ اجتماع پنڈت بھجن سوپوری کے وژن، فن اور لازوال ورثے کو خراجِ عقیدت پیش کرنے کا یادگار موقع ثابت ہوا
