جنگ نیوز
ضلع اُدھم پور کے رام نگر علاقے میں کاگورٹ گاؤں کے قریب ایک مسافر بس گہری کھائی میں گرنے سے کم از کم 21 افراد جاں بحق جبکہ 51 دیگر زخمی ہو گئے۔
حکام کے مطابق بس (نمبر JK14D-2121) رام نگر سے اُدھم پور جا رہی تھی کہ ایک تیز موڑ پر ڈرائیور کا کنٹرول ختم ہونے کے باعث تقریباً 60 سے 70 فٹ نیچے جا گری۔ حادثے کے فوراً بعد مقامی افراد، فوج، پولیس اور ریسکیو ٹیموں نے امدادی کارروائیاں شروع کیں اور زخمیوں کو اسپتال منتقل کیا گیا۔
ڈی آئی جی اُدھم پور-ریاسی رینج شیو کمار شرما نے بتایا کہ بس نیچے سڑک پر موجود ایک آٹو رکشہ سے بھی ٹکرا گئی جس سے اس کے سوار بھی زخمی ہوئے۔ واقعہ کے سلسلے میں مقدمہ درج کر کے تحقیقات شروع کر دی گئی ہیں۔
صدر دروپدی مرمو، وزیر اعظم نریندر مودی، وزیر داخلہ امیت شاہ، لیفٹیننٹ گورنر منوج سنہا اور وزیر اعلیٰ عمر عبداللہ سمیت کئی رہنماؤں نے حادثے پر گہرے رنج و غم کا اظہار کیا ہے اور متاثرہ خاندانوں سے تعزیت کی ہے۔
وزیر اعظم نے جاں بحق افراد کے لواحقین کے لئے 2 لاکھ روپے اور زخمیوں کے لئے 50 ہزار روپے امداد کا اعلان کیا، جبکہ وزیر اعلیٰ نے بھی ریلیف فنڈ سے مالی مدد دینے کا اعلان کیا ہے۔ حکام کے مطابق شدید زخمیوں کو بہتر علاج کے لئے ایئر لفٹ کرنے کے انتظامات بھی کیے جا رہے ہیں۔
