جنگ نیوز
ضلع ڈوڈہ کے بھدرواہ چمبا روڈ پر کھننی ٹاپ کے قریب ایک افسوسناک حادثے میں فوج کی گاڑی گہری کھائی میں گرنے سے 10 فوجی جوان جاں بحق جبکہ 10 دیگر زخمی ہو گئے۔ حکام کے مطابق حادثہ اس وقت پیش آیا جب پھسلن کے باعث ڈرائیور گاڑی پر قابو نہ رکھ سکا۔ گاڑی تقریباً 400 میٹر نیچے جا گری۔ چار جوان موقع پر ہی جاں بحق ہو گئے جبکہ چھ دیگر بعد میں دم توڑ گئے۔ زخمیوں کو پہلے ایس ڈی ایچ بھدرواہ اور بعد ازاں خصوصی علاج کے لیے ادھمپور کے آرمی اسپتال منتقل کیا گیا۔
یہ حادثہ اس وقت پیش آیا جب فوجی دستہ آپریشنل ڈیوٹی سے واپس آ رہا تھا۔
حادثے پر وزیر اعظم نریندر مودی، وزیر داخلہ امت شاہ، وزیر دفاع راج ناتھ سنگھ، لیفٹیننٹ گورنر منوج سنہا اور وزیر اعلیٰ عمر عبداللہ نے گہرے رنج و غم کا اظہار کیا۔ قائدین نے شہید جوانوں کی خدمات کو خراج عقیدت پیش کرتے ہوئے ان کے اہل خانہ سے تعزیت کی اور زخمیوں کی جلد صحت یابی کے لیے دعا کی۔ انہوں نے یقین دلایا کہ متاثرہ اہل خانہ اور زخمی جوانوں کو ہر ممکن مدد فراہم کی جا رہی ہے۔
وزیر اعلیٰ عمر عبداللہ نے بھی حادثے کو انتہائی افسوسناک قرار دیتے ہوئے شہدا کے اہل خانہ سے ہمدردی کا اظہار کیا اور ریسکیو کارروائیوں کو سراہا۔
