جنگ نیوز ڈیسک
پلوامہ/ جنوبی کشمیر کی تاریخ میں پہلی بار پلوامہ اسپورٹس اسٹیڈیم میں ڈے نائٹ کرکٹ ٹورنامنٹ کا آغاز ہوا، جس میں ہزاروں شائقین نے شرکت کر کے فلڈ لائٹس کے نیچے کھیلے گئے افتتاحی میچ کو تاریخی بنا دیا۔
افتتاحی تقریب میںممبر اسمبلی وحید الرحمن پرہ اور اسپورٹس کونسل کی چیئرپرسن نُزہت گل نے شرکت کی۔پرہ نے کہا کہ ایسے ایونٹس نوجوانوں کو اپنی صلاحیتیں دکھانے اور مثبت سمت میں توانائی صرف کرنے کا موقع فراہم کرتے ہیں۔ انہوں نے یقین دلایا کہ مزید ٹورنامنٹس کا انعقاد کیا جائے گا۔
نُزہت گل نے کہا کہ پلوامہ کھیلوں کے حوالے سے زرخیز خطہ ہے اور اسپورٹس کونسل انفراسٹرکچر کی فراہمی اور کھلاڑیوں کی حوصلہ افزائی جاری رکھے گی۔
شائقین نے کہا کہ اپنے شہر میں ڈے نائٹ میچ دیکھنا ایک خواب جیسا تھا، جس نے قصبے میں عید جیسا ماحول پیدا کیا۔
"رائل پریمیئر لیگ” کے نام سے منعقدہ اس ٹورنامنٹ میں تین درجن ٹیمیں حصہ لے رہی ہیں اور فائنل بھی فلڈ لائٹس کے نیچے کھیلا جائے گا۔ منتظمین کے مطابق، مقصد مقامی ٹیلنٹ کو آگے بڑھانا اور کھیلوں کے ذریعے اتحاد کو فروغ دینا ہے۔
