جنگ نیوز ڈیسک
سرینگر/جے اینڈ کے بینک نے صارفین کی شکایات کے ازالے، تجاویز اور بینکاری خدمات میں بہتری کے لیے صارفین سے براہِ راست رابطے کی خصوصی نشستوں کا سلسلہ شروع کیا ہے۔ اس سلسلے کی پہلی نشست بارہمولہ کے زونل دفتر میں منعقد ہوئی، جس میں 150 سے زائد صارفین نے شرکت کی۔
جنرل منیجر (کسٹمر کیئر) نرجے گپتا نے اجلاس کی صدارت کی، جبکہ جنرل منیجر و ڈویژنل ہیڈ (کشمیر) ارشد قادری بھی موجود تھے۔ دیگر شرکاء میں ڈپٹی جنرل منیجر پرشوتم کمار، زونل ہیڈ بارہمولہ تنویر احمد نجر، بلال احمد کچو، اور چار کلسٹر سربراہان آصف سرول، تنویر بشیر، اقبال عزیز اور محبوب الٰہی خان شامل تھے۔
اجلاس میں صارفین نے خدمات کے معیار، جعلی کھاتوں، سائبر دھوکہ دہی سے بچاؤ، محفوظ بینکاری اور شکایات کے بروقت ازالے سے متعلق مسائل اور تجاویز پیش کیں۔
نرجے گپتا نے کہا کہ صارفین کا اعتماد برقرار رکھنے کے لیے ان کی شکایات سننا اور ان کا بروقت ازالہ ضروری ہے۔ انہوں نے ڈیجیٹل بینکاری کے بڑھتے استعمال کے پیش نظر سائبر جرائم اور محفوظ لین دین سے متعلق عوامی بیداری کی اہمیت پر بھی زور دیا۔
ارشد قادری نے کہا کہ صارفین سے مسلسل رابطہ بینک کو ان کی ضروریات سمجھنے اور خدمات بہتر بنانے میں مدد دیتا ہے۔
اس موقع پر بینک کی ٹرانزیکشن مانیٹرنگ ٹیم نے جعلی کھاتوں اور مالی دھوکہ دہی سے بچاؤ کے طریقوں پر تفصیلی جانکاری دی۔
بینک کے مطابق یہ سلسلہ جموں و کشمیر، لداخ اور ملک کے دیگر حصوں میں واقع تمام زونل دفاتر تک وسعت دیا جائے گا، جبکہ اگلی نشست 5 نومبر کو اننت ناگ میں منعقد ہوگی۔
