جنگ فیچر ڈیسک
نئی دہلی/فلائی دبئی کے طیارے میں سوار 174 افراد کی جان بچانے والے بھارتی پائلٹ کیپٹن سمت مچھر کی غیر معمولی بہادری کو عالمی سطح پر سراہا جا رہا ہے۔ ہندوستان، اسرائیل اور متحدہ عرب امارات کی اعلیٰ قیادت نے ان کی جرأت، حاضر دماغی اور انسانی جانوں کے تحفظ کے جذبے کو خراجِ تحسین پیش کیا ہے۔
دبئی کے ولی عہد، متحدہ عرب امارات کے نائب وزیر اعظم اور وزیر دفاع شیخ حمدان بن محمد بن راشد المکتوم نے زخمی پائلٹ سے ملاقات کی اور ان کی بہادری کو سراہتے ہوئے کہا کہ انہوں نے ’’جرأت، ذمہ داری اور انسانی زندگی کے احترام کی اعلیٰ ترین مثال پیش کی ہے۔‘‘
ملاقات کے بعد اپنے پیغام میں شیخ حمدان نے کہا کہ متحدہ عرب امارات کو کیپٹن سمت کی اپنی ٹیم کا حصہ ہونے پر فخر ہے۔ انہوں نے پائلٹ کو ملک کی ان اقدار کا نمائندہ قرار دیا جو ہمدردی، امن اور زندگی کے احترام پر مبنی ہیں۔
اسرائیلی وزیر اعظم بنجمن نیتن یاہو نے بھی کیپٹن سمت سے گفتگو کی، جبکہ تل ابیب میں ایک خصوصی تقریب منعقد کرکے انہیں اعزاز سے نوازا گیا اور فلائی دبئی کے طیارے کی بحفاظت لینڈنگ کا جشن منایا گیا۔
اس سے قبل 2 اکتوبر کو وزیر اعظم نریندر مودی نے بھی کیپٹن سمت سے بات کرکے ان کی بہادری کی تعریف کی اور صحت یابی کے دوران ملک کی مکمل حمایت کا یقین دلایا۔
خوفناک فضائی حادثہ ٹل گیا
یہ واقعہ فلائی دبئی کی پرواز FZ1073 میں پیش آیا، جو 174 مسافروں اور عملے کے ارکان کو لے کر دبئی سے تل ابیب جا رہی تھی۔
سفر کے دوران مبینہ طور پر معاون پائلٹ نے کاک پٹ میں کیپٹن سمت پر حملہ کرکے انہیں زخمی کر دیا اور طیارے کا کنٹرول سنبھالنے کی کوشش کی۔ اس دوران طیارہ تقریباً 14000 فٹ نیچے آ گیا، جس سے مسافروں میں خوف و ہراس پھیل گیا۔
شدید زخمی ہونے کے باوجود کیپٹن سمت نے ہمت نہیں ہاری اور کاک پٹ کا دروازہ کھولنے میں کامیاب رہے، جس کے بعد مسافروں اور عملے نے حملہ آور کو قابو کرکے طیارے کا کنٹرول بحال کرنے میں مدد دی۔
بعد ازاں طیارے کا رخ سعودی عرب کے شہر تبوک کی جانب موڑ دیا گیا، جہاں اس نے بحفاظت ہنگامی لینڈنگ کی۔ اس واقعے میں تمام 174 افراد محفوظ رہے، تاہم بعض مسافروں کو معمولی چوٹیں آئیں۔
ایک ممکنہ فضائی سانحے کو بہادری کی داستان میں بدلنے والے کیپٹن سمت مچھر کی جرأت آج سرحدوں سے ماورا انسانی ہمت، فرض شناسی اور زندگی سے محبت کی علامت بن چکی ہے۔
