جنگ نیوز
سرینگر/جموں و کشمیر میں سرکاری ملازمتوں کے لئے بھرتی کے عمل کو منظم اور مؤثر بنانے کے سلسلے میں جموں و کشمیر پبلک سروس کمیشن (JKPSC) اور جموں و کشمیر سروس سلیکشن بورڈ (JKSSB) نے گزشتہ دو برس کے دوران امیدواروں سے درخواست اور امتحانی فیس کی مد میں 82 کروڑ روپے سے زائد جمع کیے ہیں۔
سرکاری اعداد و شمار کے مطابق JKPSC نے 150099000 روپے جبکہ JKSSB نے 674441800 روپے فیس کی مد میں وصول کیے۔
حکومت کے مطابق یہ رقم بھرتی کے پورے عمل کو منظم انداز میں انجام دینے کے لئے درکار مختلف اخراجات کو جزوی طور پر پورا کرنے میں استعمال ہوتی ہے۔ ان اخراجات میں درخواستوں کی جانچ، امتحانی مراکز اور عملے کا انتظام، سوالیہ پرچوں کی تیاری و حفاظت، سکیورٹی انتظامات، آئی ٹی سہولیات، جوابی پرچوں کی جانچ اور نتائج کی تیاری شامل ہیں۔
حکومت نے واضح کیا کہ بھرتی کرنے والے ادارے متعلقہ قوانین کے تحت فیس مقرر کرتے ہیں اور مستحق زمروں کو مقررہ ضوابط کے مطابق رعایت بھی فراہم کی جاتی ہے۔
حکومت کے مطابق درخواست اور امتحانی فیس کو آمدنی یا منافع کا ذریعہ نہیں سمجھا جاتا بلکہ اس کا مقصد بھرتی کے شفاف، منظم اور مؤثر نظام پر آنے والے اخراجات کا ایک حصہ پورا کرنا ہے۔ یہ طریقۂ کار UPSC اور SSC جیسے قومی سطح کے بھرتی اداروں میں رائج نظام سے بھی مطابقت رکھتا ہے۔
