جنگ نیوز
عوامی اتحاد پارٹی کے چیف ترجمان انعام النبی نے وزیراعلیٰ عمر عبداللہ سے شہر خاص میں نکاسیٔ آب اور بارش کے بعد پانی جمع ہونے کے دیرینہ مسئلے کا فوری اور مستقل حل نکالنے کا مطالبہ کیا ہے۔
انعام النبی نے کہا کہ معمولی بارش کے بعد بھی شہر خاص کے متعدد علاقوں میں پانی گھروں اور تجارتی اداروں میں داخل ہو جاتا ہے، جس سے دکانداروں اور مقامی باشندوں کو بھاری مالی نقصان اٹھانا پڑتا ہے۔
انہوں نے حکومت سے نکاسیٔ آب اور سیوریج نظام کی جامع بہتری، نالوں کی باقاعدہ صفائی، قدرتی آبی گزرگاہوں کی بحالی اور نکاسیٔ آب میں رکاوٹ بننے والی تجاوزات ہٹانے کا مطالبہ کیا۔ انہوں نے صفائی، سڑکوں، ٹریفک نظم و نسق اور پارکنگ کی سہولیات بہتر بنانے پر بھی زور دیا۔
انعام النبی نے کہا کہ وزیراعلیٰ کا دورہ خوش آئند ہے، تاہم شہر خاص کے عوام کو عارضی طور پر پانی نکالنے کے بجائے مستقل حل درکار ہے۔ انہوں نے اس مقصد کے لئے مقررہ مدت پر مبنی عملی منصوبہ تیار کرنے کا مطالبہ کیا۔
