جنگ نیوز
گاندربل: گاندربل کے نونر میں منعقدہ لیونڈر فیسٹیول محض ایک زرعی تقریب نہیں بلکہ کشمیر کی بدلتی زرعی ترجیحات کا عکاس بن کر سامنے آیا۔ وزیر اعلیٰ عمر عبداللہ نے فیسٹیول کا افتتاح کرتے ہوئے کہا کہ لیونڈر کی کاشت جموں و کشمیر کی ترقی اور خوشحالی کے سفر میں ایک نیا باب ہے۔
انہوں نے کہا کہ موسمیاتی تبدیلیوں کے دور میں لیونڈر جیسی زیادہ منافع بخش اور موسمی حالات سے ہم آہنگ فصلیں کسانوں کے لئے بہتر معاشی مواقع فراہم کر سکتی ہیں۔ ان کے مطابق لیونڈر سے حاصل ہونے والا ضروری تیل، ویلیو ایڈیشن اور اس سے جڑی صنعتیں دیہی معیشت کو مضبوط بنانے میں اہم کردار ادا کر سکتی ہیں۔
وزیر اعلیٰ نے کہا کہ گاندربل کے خوبصورت جامنی کھیت مستقبل میں سیاحوں کے لئے بھی کشش کا مرکز بن سکتے ہیں، خاص طور پر سونہ مرگ جانے والے سیاحوں کے لئے۔ ان کا کہنا تھا کہ اس سے مقامی آبادی کے لئے آمدنی کے نئے ذرائع پیدا ہوں گے۔
اس موقع پر انہوں نے پانچ کروڑ روپے سے زائد لاگت کے ایک اہم منصوبے کا سنگ بنیاد رکھا، جس کے تحت ادویاتی اور خوشبودار پودوں کی پروسیسنگ، ذخیرہ کاری، کشید کاری اور مارکیٹنگ کی جدید سہولیات قائم کی جائیں گی۔
فیسٹیول میں کسانوں، زرعی ماہرین، طلبہ اور مقامی باشندوں نے بڑی تعداد میں شرکت کی۔ مختلف اسٹالوں پر لیونڈر کی کاشت، ضروری تیل کی تیاری اور زرعی اختراعات کی نمائش بھی کی گئی۔
نونر کے یہ جامنی کھیت اس حقیقت کی نشاندہی کر رہے ہیں کہ کشمیر کی زراعت اب روایتی فصلوں سے آگے بڑھ کر نئی معاشی اور سیاحتی امکانات کی طرف قدم بڑھا رہی ہے۔
