سرینگر
13 جون۔ ڈائریکٹوریٹ آف سکول ایجوکیشن کشمیر (ڈی ایس ای کے) نے کشمیر بھر کے تمام سرکاری اور پرائیویٹ تسلیم شدہ سکولوں کو ہدایت کی ہے کہ وہ محرم الحرام کے دوران اندرون خانہ امتحانات، انٹرنل اسیسمنٹ یا مدتی امتحانات کا انعقاد نہ کریں۔ ڈائریکٹر اسکول ایجوکیشن کشمیر کے جاری کردہ ایک حکم کے مطابق، جس کی ایک کاپی نیوز ایجنسی جے کے این ایس کے پاس ہے، تمام اسکولوں کو ہدایت دی گئی ہے کہ وہ 23 جون سے 27 جون 2026 تک کسی بھی کلاس کے امتحانات منعقد نہ کریں۔ حکم نامے میں کہا گیا ہے کہ یہ فیصلہ محرم الحرام کے قریب آنے کے پیش نظر کیا گیا ہے۔ حکم میں کہا گیا ہے کہ "تمام سرکاری/نجی تسلیم شدہ اسکولوں سے یہ متاثر کیا جاتا ہے کہ وہ 23 جون سے 27 جون 2026 تک تمام کلاسوں کے اندرون خانہ امتحانات/انٹرنل اسیسمنٹ/ٹرم امتحان کا انعقاد نہ کریں۔ ڈائریکٹوریٹ نے یہ بھی متنبہ کیا ہے کہ ہدایات سے کوئی انحراف یا ان پر عمل نہ کرنے پر متعلقہ قواعد کے تحت تادیبی کارروائی کی دعوت دی جائے گی۔
