بلال بشیر بٹ
جنگ نیوز ڈیسک
سرینگر/وزیر اعلیٰ عمر عبداللہ نے جمعہ کے روز سرینگر میںشیر کشمیر شیر کشمیر یونیورسٹی آف ایگریکلچرل سائینسز اینڈ ٹیکنالوجی آف کشمیر میں منعقدہ گیارہویں ٹیکنالوجی نمائشGon’Gul 2026 کا افتتاح کیا۔
تین روزہ نمائش کا موضوع "میری پیداوار، میری قیمت "رکھا گیا ہے جس کا مقصد کسانوں، زرعی کاروباری افراد اور نوجوانوں کو جدید کاشتکاری طریقوں، اختراعات اور بہتر منڈی رسائی کے ذریعے بااختیار بنانا ہے۔
تقریب میں وزیر زراعت جاوید ڈار اور وزیر صحت و تعلیم سکینہ ایتو سمیت دیگر معززین نے شرکت کی۔
اجتماع سے خطاب کرتے ہوئے وزیر اعلیٰ نے زرعی شعبے میں مسلسل تحقیق اور جدت طرازی پر اسکوَاسٹ کی کاوشوں کو سراہا۔ انہوں نے کہا کہ اس نوعیت کے اقدامات پائیدار زرعی کاروبار کو فروغ دیں گے، دیہی معیشت کو مستحکم کریں گے اور جموں و کشمیر بھر میں کسانوں کے معیارِ زندگی کو بہتر بنائیں گے۔
نمائش میں اسمارٹ فارمنگ شو، پھلوں کی نمائش، اسٹارٹ اپ شو، فنون و دستکاری نمائش، بیجوں کی نمائش، سبزیوں کی نمائش، نامیاتی کاشتکاری شو اور فوڈ کارنیوال سمیت متعدد معلوماتی اور باہمی تبادلہ خیال پر مبنی اسٹالز شامل ہیں۔
تقریب میں چار سو سے زائد اسٹالز لگائے گئے ہیں جن میں کسان، نو قائم شدہ ادارے، زرعی کمپنیاں، تحقیقی مراکز اور خود امدادی گروپ شامل ہیں۔ منتظمین کے مطابق تین دنوں کے دوران چار سے پانچ لاکھ افراد کی آمد متوقع ہے۔، جس سے یہ خطے کی بڑی زرعی ٹیکنالوجی نمائشوں میں شمار ہوگی۔
حکام کے مطابق یہ نمائش زرعی اور متعلقہ شعبوں میں معلومات کے تبادلے، ٹیکنالوجی کی منتقلی اور قدر افزائی کے فروغ کے لیے ایک مؤثر پلیٹ فارم فراہم کرتی ہے۔
