جنگ نیوز
پینتالیس سالہ نتن نابن کو وزیر اعظم نریندر مودی اور پارٹی کے سینئر رہنماؤں کی موجودگی میں منعقدہ تقریب میں باضابطہ طور پر بھارتیہ جنتا پارٹی (بی جے پی) کا قومی صدر قرار دیا گیا۔
بہار سے پانچ مرتبہ کے ایم ایل اے نتن نابن پارٹی کے اعلیٰ منصب کے لیے واحد امیدوار تھے اور انہیں وزیر اعظم مودی سمیت سینئر بی جے پی قیادت کی حمایت حاصل تھی۔ سنگٹھن پرو کے موقع پر بی جے پی کے قومی انتخابی افسر کے لکشمن نے انہیں انتخابی سرٹیفکیٹ پیش کیا۔
اس تقریب میں سابق بی جے پی صدر و مرکزی وزیر جے پی نڈا، وزیر داخلہ امت شاہ، وزیر نتن گڈکری اور وزیر دفاع راج ناتھ سنگھ شریک تھے۔ اس کے علاوہ بی جے پی کی حکومت والی ریاستوں کے وزرائے اعلیٰ، قومی عہدیداران، ریاستی صدور اور قومی عاملہ کے ارکان بھی موجود تھے۔
خطاب کرتے ہوئے وزیر اعظم مودی نے کہا کہ بی جے پی کا کارکن ہونا فخر کی بات ہے اور پارٹی ایک منظم و باوقار جماعت ہے، اس لحاظ سے اب نتن نابن ان کے بھی سربراہ ہیں۔
وزیر اعظم نے کہا کہ آئندہ 25 سال ایک ترقی یافتہ بھارت کی تعمیر کے لیے نہایت اہم ہوں گے اور نتن نابن جیسے نوجوان رہنما بی جے پی کے ورثے کو آگے بڑھانے میں کلیدی کردار ادا کریں گے۔
انہوں نے دراندازوں کو قومی سلامتی کے لیے خطرہ قرار دیتے ہوئے کہا کہ ان کی حمایت کرنے والی جماعتوں کا اصل چہرہ عوام کے سامنے لانا ضروری ہے۔
مزید برآں، وزیر اعظم نے کانگریس پارٹی کے زوال کا ذمہ دار خاندانی سیاست کو ٹھہراتے ہوئے کہا کہ یہ جماعت ایک ہی خاندان پر اس قدر انحصار کرتی ہے کہ انتخابی شکستوں کا جائزہ لینے سے بھی گریزاں ہے۔
جموں کشمیر بھاجپا رہنماؤں کی مبارکباد
جنگ نیوز
جموں و کشمیر بی جے پی کے صدر ست شرما سی اے اور دیگر سینئر رہنماؤں نے نتن نابن کو بی جے پی کا قومی صدر منتخب ہونے پر مبارکباد دی۔
رہنماؤں نے نیک تمناؤں کا اظہار کرتے ہوئے کہا کہ نتن نابن کی قیادت سے پارٹی مزید مضبوط ہوگی۔ ست شرما، اشوک کول، سنیل شرما اور جگل کشور شرما نے یقین ظاہر کیا کہ ان کی قیادت پارٹی کارکنوں میں نیا جوش اور تنظیمی استحکام لائے گی۔
