جنگ نیوز ڈیسک
سرینگر: لیفٹیننٹ گورنر شری منوج سنہا نے آج لوک بھون میں معروف ادیب اور شاعر ڈاکٹر ستیش ومل کی ہندی شاعری کی تازہ کتاب ہندورا کی رسم اجرا انجام دی۔ اس موقع پر لیفٹیننٹ گورنر نے ڈاکٹر ومل کو مبارکباد پیش کرتے ہوئے ادبی دنیا میں ان کی ہمہ جہت اور گراں قدر خدمات کو خراج تحسین پیش کیا۔
لیفٹیننٹ گورنر نے کہا کہ ڈاکٹر ستیش ومل کی تخلیقات فکری گہرائی، تہذیبی شعور اور جمالیاتی لطافت کا حسین امتزاج ہیں جو قاری کو محض الفاظ کی سطح پر نہیں بلکہ فہم و ادراک کی نئی جہتوں تک لے جاتی ہیں۔ انہوں نے اس امر پر مسرت کا اظہار کیا کہ ہندورا جیسی تخلیقات جموں و کشمیر کے فکری، ثقافتی اور روحانی تنوع کو ایک آفاقی ادبی زبان عطا کرتی ہیں۔
یہ کتاب ڈاکٹر ستیش ومل کی تصنیفی زندگی کی 33ویں کتاب ہے جبکہ شاعری کے مجموعوں میں یہ ان کا 13واں مجموعہ ہے۔ ہندورا میں جموں و کشمیر کی فکری روایت، فلسفیانہ بصیرت اور فنکارانہ احساس کو نہایت سلیقے اور وقار کے ساتھ پیش کیا گیا ہے، جو خطے کی تہذیبی روح کی عکاسی کرتا ہے۔
لیفٹیننٹ گورنر نے اس امید کا اظہار کیا کہ ڈاکٹر ومل کی یہ نئی کاوش ادب کے سنجیدہ قارئین اور فکری حلقوں میں پذیرائی حاصل کرے گی اور آنے والی نسلوں کے لیے فکری رہنمائی کا ذریعہ بنے گی۔
