جنگ نیوز ڈیسک
تھائی لینڈ کی اوپل سوچاتا چوئنگسری نے آج رات حیدرآباد میں منعقدہ 72 ویں مس ورلڈ مقابلے میں مس ورلڈ 2025 کا تاج اپنے نام کر لیا۔ ایتھوپیا کی حسّت درجے آدمسو پہلی رنر اپ جبکہ پولینڈ کی ماجا کلیڈا دوسری رنر اپ قرار پائیں۔
22 سالہ اوپل، جو فوٹ سے تعلق رکھتی ہیں، نے اپنی خود اعتمادی، وقار اور خواتین کی صحت کے بارے میں شعور بیدار کرنے کے عزم سے سب کو متاثر کیا۔ اس عالمی مقابلے میں دنیا بھر کے 100 سے زائد امیدواروں نے حصہ لیا۔مارٹینک، ایتھوپیا، پولینڈ اور تھائی لینڈ کی امیدواروں نے فائنل تک رسائی حاصل کی۔
مارٹینک کی امیدوار کو مس امریکہ اینڈ کریبین قرار دیا گیا جبکہ ایتھوپیا کی امیدوار کو مس افریقہ کا اعزاز ملا۔ پولینڈ کی امیدوار کو مس یورپ اور تھائی لینڈ کی امیدوار کو مس ایشیا اینڈ اوشیانا کا ٹائٹل دیا گیا۔اسی دوران ممتاز اداکار سونو سود کو ان کی فلاحی خدمات کے اعتراف میں مس ورلڈ ہیومینیٹرین ایوارڈ سے نوازا گیا۔
