جنگ نیوز
سرینگر/کشمیری کسان ظفر احمد بٹ کو نئی دہلی میں منعقدہ بھارت بین الاقوامی چاول کانفرنس کے دوران مقامی قسم کے خوشبودار چاول ’مشک بُجی‘ کے تحفظ کے لئے ان کی کوششوں پر اعزاز سے نوازا گیا۔
اننت ناگ ضلع کا ساگام گاؤں بلند علاقوں میں کاشت ہونے والے اس خوشبودار چاول کی ایک اہم مرکز ہے۔ مشک بُجی کو اس کی منفرد خوشبو اور چھوٹے دانوں کی وجہ سے پہچانا جاتا ہے، جبکہ 2023 میں اسے جغرافیائی شناخت (GI) کا ٹیگ بھی ملا۔
بین الاقوامی کانفرنس میں جموں و کشمیر نے اوڈیشہ، آسام اور تلنگانہ سمیت دیگر زرعی ریاستوں کے ساتھ شرکت کرتے ہوئے مقامی اور خصوصی اقسام کے چاول کی نمائش کی۔ اس اقدام کا مقصد ان اقسام کے لئے بہتر تجارتی روابط قائم کرنا اور انہیں بین الاقوامی منڈیوں تک پہنچانا ہے۔
جموں و کشمیر کی نمائندگی محکمہ زراعت، پیداوار اور بہبودِ کساناں نے کی، جبکہ ڈائریکٹر زراعت کشمیر سرتاج احمد شاہ بھی کانفرنس میں شریک ہوئے۔
کانفرنس کے دوران محکمہ بین الاقوامی چاول تحقیقی ادارے (IRRI) اور زرعی و پراسیس شدہ غذائی مصنوعات کی برآمدات کے فروغ کی اتھارٹی (APEDA) سمیت مختلف اداروں کے ساتھ خصوصی اقسام کے چاول کو فروغ دینے کے امکانات پر تبادلۂ خیال کر رہا ہے۔
کانفرنس میں عالمی خریداروں، پالیسی سازوں، محققین اور برآمد کنندگان نے شرکت کی، جہاں عالمی چاول کی صنعت میں بھارت کی حیثیت کو اجاگر کیا گیا۔
