پہلے روز جموں کشمیر کے سر فراز احمد نے سونے کا تمغہ جیت لیا
جنگ نیوز ڈیسک
گاندربل/گورنمنٹ کالج آف فزیکل ایجوکیشن (GCOPE)، گاندربل میں 70ویں قومی اسکول گیمز تائیکوانڈو چیمپئن شپ کا آغاز ہوا، جس میں ملک بھر کی مختلف ریاستوں اور تعلیمی بورڈز کے کھلاڑی حصہ لے رہے ہیں۔
جموں و کشمیر کے سر فراز احمد نے شاندار کارکردگی کا مظاہرہ کرتے ہوئے انڈر 63 کلوگرام زمرے میں سونے کا تمغہ حاصل کیا۔ انہوں نے فائنل مقابلے میں سی بی ایس ای کے ایحان وسیم کو شکست دے کر مرکز کے زیرِ انتظام علاقے کا نام روشن کیا۔
افتتاحی تقریب میں ایس ایس پی گاندربل ہرشل راجیش مہاجن نے بحیثیت مہمانِ خصوصی چیمپئن شپ کا افتتاح کیا۔ اس موقع پر انہوں نے کھلاڑیوں کو کھیل کے جذبے اور اسپورٹس مین اسپرٹ کو برقرار رکھنے کی تلقین کی۔ محکمۂ یوتھ سروسز اینڈ اسپورٹس کی ایڈیشنل سیکریٹری ٹینا مہاجن سمیت دیگر عہدیداران بھی موجود تھے۔
چیمپئن شپ کے پہلے روز مختلف وزن کے زمروں میں مجموعی طور پر 157 مقابلے منعقد ہوئے۔ انڈر 48 کلوگرام زمرے میں اتراکھنڈ کے فخر تیواری نے آسام کے ابیناش کو شکست دے کر طلائی تمغہ جیتا، جبکہ انڈر 32 کلوگرام زمرے میں تمل ناڈو کی آنیا نے کیرالہ کی انسا کو ہرا کر سونے کا تمغہ اپنے نام کیا۔
گاندربل میں جاری اس قومی چیمپئن شپ کے ذریعے نوجوان کھلاڑیوں کو اپنی صلاحیتوں، محنت اور کھیل کے جذبے کے اظہار کا موقع مل رہا ہے۔
