جنگ نیوز ڈیسک
انجمن اوقاف جامع مسجد سرینگر نے جامع مسجد سرینگر کے امام حی، بزرگ عالم دین احمد سعید نقشبندی کی خواہش کے مطابق موصوف کی پیرانہ سالی اور خرابی صحت کی بنا پر ان کے فرزند ارجمند شکیل احمدنقشبندی کو مرکزی جامع مسجد سرینگر کا نائب امام حی کا عہدہ سونپا گیا۔
نماز جمعہ کے موقعہ پر ایک خصوصی تقریب میں صدر انجمن میرواعظ کشمیر ڈاکٹر مولوی محمد عمر فاروق نے اس بات کا اعلان کرتے ہوئے شکیل احمد نقشبندی پر نائب امام کی ذمہ داریاں سپرد کی اور انجمن کے عہدیداروں کے ساتھ امام حی کی موجودگی میں موصوف کی باضابطہ دستار بندی کی گئی۔
اس موقعہ پر جناب میرواعظ نے اپنی اور انجمن اوقاف کی طرف سے مولانا احمد سعید نقشبندی کی طویل ترین خدمات کو خراج تحسین پیش کرتے ہوئے اللہ تبارک و تعالیٰ سے ان کی صحت و عافیت کی خصوصی دعا کی اور محترم شکیل احمدنقشبندی کو منصب سنبھالنے پر نیک خواہشات ، تہنیت اور مبارکباد پیش کی۔
میرواعظ نے توقع ظاہر کی کہ شکیل احمد نقشبندی اپنے اکابر و اسلاف خاص طور پر والد گرامی مولانا احمد سعید نقشبندی کے نقش قدم پر چلتے ہوئے تاریخی جامع مسجد کے تئیں اپنی ذمہ داریاں احسن طریقے سے نبھانے کی کوشش کریں گے۔
