بلال بشیربٹ
سرینگر/جنگ نیوز/میٹرو گروپ آف اسپتالز، Metro Group of Hospitalsجو شمالی ہند کا ایک معروف طبی ادارہ ہے، نے سرینگر، جموں و کشمیر میں اپنی ملٹی اسپیشلٹیOPD خدمات کا آغاز کیا ہے۔ یہ سہولت La Fe Medical Centre لا فی میڈیکل سینٹر، صدیق آباد، لولاوئے پورہ (نزدیک TKکالج، HMT) میں قائم کی گئی ہے، جس سے وادی میں جدید طبی مشاورت عام لوگوں کی دسترس میں آئے گی۔
افتتاحی تقریب میں میٹرو اسپتال فریدآباد کے متعدد ماہرین شریک ہوئے، جن میں ڈاکٹر ثنا طارق (وائس پریزیڈنٹ، میٹرو گروپ)، ڈاکٹر سمنت گپتا (ہیڈ آنکولوجی)، ڈاکٹر شیلندر لالوانی (ڈائریکٹر لیور ٹرانسپلانٹ و جی آئی سرجری) اور ڈاکٹر اشوک دھر (ڈائریکٹر آرتھوپیڈکس و جوائنٹ ریپلیسمنٹ) شامل تھے۔
ڈاکٹر ثنا طارق نے کہا کہ اس اقدام کا مقصد ملک کے ہر حصے میں اعلیٰ طبی سہولیات کی فراہمی کو یقینی بنانا ہے۔
انہوں نے کہا، “سرینگر میں او پی ڈی کے آغاز سے مریضوں کو ابتدائی تشخیص، ماہر مشورہ اور معیاری رہنمائی وہیں میسر ہوگی، بغیر طویل سفر کے۔”
ڈاکٹر سمنت گپتا نے سرطان کے علاج میں بروقت تشخیص کی اہمیت پر زور دیتے ہوئے کہا کہ اب وادی کے مریضوں کو میٹرو اسپتال کے آنکولوجی ماہرین سے باقاعدہ مشورہ و فالو اَپ کی سہولت دستیاب ہوگی۔
ڈاکٹر شیلندر لالوانی نے کہا کہ جگر کے مریضوں کو اب سرجری سے قبل اور بعد میں ماہرانہ جائزہ مقامی سطح پر مل سکے گا، جب کہ ڈاکٹر اشوک دھر نے بتایا کہ آرتھوپیڈکس او پی ڈی جوڑوں کے مریضوں کی بحالی و فزیوتھراپی پر خصوصی توجہ دے گی۔
لا فی میڈیکل سینٹر کی ڈائریکٹر ڈاکٹر غزال انور نے کہا کہ یہ اشتراک کشمیری عوام کے لیے جدید علاج کے نئے دروازے کھولے گا۔
مرکز کے مالک ڈاکٹر عمر گل نے بتایا کہ یہ منصوبہ جے کے ہوپ کینسر کیئر فاؤنڈیشن کے سربراہ اقبال حسین کے اشتراک سے تشکیل پایا ہے تاکہ کشمیر کے طبی نظام کو قومی معیار سے جوڑا جا سکے۔
میٹرو اسپتال کے مطابق، سرینگر میں یہ خصوصی او پی ڈی ہر ماہ کے آخری اتوار کو باقاعدگی سے منعقد کی جائے گی تاکہ مریضوں کو تسلسل کے ساتھ ماہرین کی خدمات حاصل رہیں۔
