جنگ نیوز
امریکی صدر ڈونلڈ ٹرمپ نے ایران پر ایک اور فوجی حملے کا اشارہ دیا ہے، جبکہ ایرانی حکام نے خبردار کیا ہے کہ جوابی کارروائی کے طور پر خلیج میں زیرِ سمندر انٹرنیٹ کیبلز کو نقصان پہنچایا جاسکتا ہے۔ یہ بیانات جمعہ کو سامنے آئے، جب آٹھ ماہ سے جاری تنازع کے خاتمے کی کوششوں میں پیش رفت نہ ہوسکی۔
زیرِ سمندر کیبلز کو ممکنہ نقصان پہنچنے سے مشرقِ وسطیٰ کے بعض حصوں میں بینکاری، آن لائن خدمات اور مواصلاتی نظام متاثر ہونے کا خدشہ ہے۔
اس سے قبل ٹرمپ نے کہا تھا کہ امریکا اس تنازع کو تیزی سے ختم کرنے کی صلاحیت رکھتا ہے، تاہم انہوں نے یہ امکان بھی ظاہر کیا کہ لڑائی کو بتدریج ختم ہونے دیا جاسکتا ہے۔
ان کے یہ بیانات رواں ماہ کے اوائل میں دیے گئے اس بیان کے باوجود سامنے آئے ہیں، جس میں انہوں نے کہا تھا کہ امریکا 3 نومبر کو ہونے والے وسط مدتی انتخابات سے قبل ایران پر حملہ نہیں کرے گا۔
دریں اثنا، ایندھن کی بڑھتی ہوئی قیمتوں نے ٹرمپ انتظامیہ پر دباؤ میں اضافہ کردیا ہے، کیونکہ امریکی ووٹرز نئے کانگریس ارکان کے انتخاب کی تیاری کر رہے ہیں۔
