حکیم سہیل عباس
سرینگر/عوامی حلقوں نے چیری پارک اور مغربی نگین میں ترقیاتی منصوبوں کے حوالے سے یکساں اور شفاف پالیسی اپنانے پر زور دیتے ہوئے مطالبہ کیا ہے کہ مجوزہ منصوبوں کا غیر جانب دارانہ اور شواہد پر مبنی جائزہ لیا جائے۔
عوامی حلقوں نے سوال اٹھایا کہ جب ڈل جھیل، بولیوارڈ روڈ اور فورشور نشاط روڈ کے ساتھ جھیل کے تحفظ اور بنیادی سہولیات کو یکجا کرنا ممکن ہے تو مغربی نگین میں بہتر سڑک رابطے اور دیگر عوامی سہولیات کی تجاویز پر بھی اسی معیار کے تحت غور کیوں نہیں کیا جاتا۔
انہوں نے کہا کہ ماحولیاتی تحفظ اور ترقی ایک دوسرے کے مخالف نہیں، بلکہ شفاف منصوبہ بندی اور متعلقہ قوانین پر عمل درآمد کے ذریعے دونوں مقاصد حاصل کیے جا سکتے ہیں۔
عوامی حلقوں نے مقامی نوجوانوں کے لئے کھیل کے میدان، جھیل کنارے عوامی مقامات تک رسائی اور بہتر سڑک رابطے کی ضرورت اجاگر کرتے ہوئے کہا کہ غیر قانونی تجاوزات، عوامی مقامات کی بدحالی اور ماحولیاتی بگاڑ جیسے مسائل پر بھی مؤثر کارروائی ضروری ہے۔
انہوں نے منتخب نمائندوں، ماحولیاتی کارکنوں اور متعلقہ انتظامیہ سے اپیل کی کہ مقامی باشندوں کو اعتماد میں لے کر مجوزہ منصوبوں، ماحولیاتی جائزوں اور حفاظتی اقدامات کی تفصیلات عوام کے سامنے رکھی جائیں۔
عوامی حلقوں نے واضح کیا کہ مقصد بے قابو تعمیرات کو فروغ دینا نہیں، بلکہ جھیل کے تحفظ کے ساتھ مغربی نگین میں ذمہ دارانہ ترقی اور عوامی سہولیات کو یقینی بنانا ہے۔
