سرینگر، 5 اگست
بونیار کے گاؤں لاچی پورہ کے بالائی علاقوں میں بدھ کے روز ممکنہ طور پر بادل پھٹنے (کلاؤڈ برسٹ) کے باعث اچانک طغیانی اور سیلا بی ریلہ آ گیا، جس کے نتیجے میں بھاری مقدار میں کیچڑ، ملبہ اور اکھڑے ہوئے درخت بہتے ہوئے نیچے گاؤں کی طرف آ گئے۔
حکام نے نیوز ایجنسی کو بتایا کہ یہ واقعہ دوپہر کے وقت جنگلاتی بالائی علاقے سے رپورٹ ہوا۔ اطلاع ملتے ہی ایس ایچ او بیجہامہ کی قیادت میں پولیس ٹیم موقع پر پہنچ گئی تاکہ صورتحال کا جائزہ لیا جا سکے اور حالات پر نظر رکھی جا سکے۔
پانی اور کیچڑ کے اچانک تیز بہاؤ کے باعث علاقے میں خوف و ہراس پھیل گیا، جس کے بعد انتظامیہ کو ہائی الرٹ پر رہنے کی ہدایت دی گئی ہے۔
حکام کے مطابق، فی الحال کسی جانی نقصان یا املاک کو نقصان پہنچنے کی اطلاع موصول نہیں ہوئی ہے۔ واقعے کے اثرات کا جائزہ لیا جا رہا ہے اور مزید تفصیلات کا انتظار ہے۔
