جنگ نیوز ڈیسک
نئی دہلی/ وزیر اعظم نریندر مودی نے پارلیمنٹ کے مانسون اجلاس کے دوران NDA پارلیمانی پارٹی کے اجلاس، جسے ’’منگل ملن‘‘ کا نام دیا گیا، کی صدارت کرتے ہوئے NEET پیپر لیک کو ’’گھور پاپ‘‘ (سنگین گناہ) قرار دیا اور کہا کہ نوجوانوں کے مستقبل سے کسی کو کھیلنے کی اجازت نہیں دی جائے گی۔
اجلاس میں وزیر اعظم نے کہا کہ حکومت کی اولین ترجیح نوجوانوں کا اعتماد جیتنا ہے۔ انہوں نے ارکانِ پارلیمان پر زور دیا کہ وہ طلبہ اور نوجوانوں کے ساتھ مسلسل رابطہ رکھیں، کیونکہ امتحانی نظام پر اعتماد کی بحالی قومی اہمیت کا معاملہ ہے، محض سیاسی بحث نہیں۔
ذرائع کے مطابق وزیر اعظم نے کہا کہ پیپر لیک کی اطلاعات سامنے آتے ہی حکومت نے فوری کارروائی کی، 13 افراد کو گرفتار کیا گیا اور دوبارہ امتحان کو ترجیحی بنیادوں پر شفاف انداز میں منعقد کرایا گیا، جس کے نتائج بھی بلا تاخیر جاری کیے گئے۔
اجلاس میں اس بات پر بھی زور دیا گیا کہ پیپر لیک میں ملوث افراد کو سخت ترین سزا دلانے کے لئے ماہر اور مضبوط قانونی ٹیمیں تعینات کی جائیں گی تاکہ کوئی بھی قصوروار قانون کی گرفت سے نہ بچ سکے۔ امتحانی نظام کو مزید محفوظ، شفاف اور ناقابلِ نفوذ بنانے کے لئے جامع اصلاحات پر بھی تبادلۂ خیال کیا گیا۔
وزیر اعظم نے NDA کے ارکانِ پارلیمان سے کہا کہ وہ عوام، خصوصاً نوجوانوں کے ساتھ مسلسل رابطے میں رہیں اور حکومت کی پالیسیوں اور اقدامات کو مؤثر انداز میں عوام تک پہنچائیں۔ اجلاس میں پارلیمنٹ کے بقیہ مانسون اجلاس کے لئے قانون سازی، ایوانی حکمتِ عملی اور اتحادی جماعتوں کے درمیان بہتر ہم آہنگی پر بھی غور کیا گیا۔
