جنگ نیوز ڈیسک
سرینگر/ وزیر اعظم نریندر مودی 6 جون کو کشمیر ریل پروجیکٹ کا طویل انتظار کے بعد افتتاح کرنے جا رہے ہیں، جسے بھارت کے ریلوے ڈھانچے کی تعمیر میں ایک تاریخی سنگ میل اور کشمیر وادی کو باقی ملک سے جوڑنے کی سمت میں ایک اہم پیش رفت قرار دیا جا رہا ہے۔
مودی اپنے دورے کا آغاز دریائے چناب پر واقع دنیا کے بلند ترین ریلوے آرچ پل چناب ریلوے پل کو قوم کے نام وقف کر کے کریں گے، جس کی بلندی سطح دریا سے 369 میٹر ہے، جو ایفل ٹاور سے بھی زیادہ ہے۔ یہ پل اُدھم پور-سرینگر-بارہ مولہ ریلوے لائن (یو ایس بی آر ایل) کا حصہ ہے، جو جموں و کشمیر کو قومی ریلوے نیٹ ورک سے مزید گہرائی سے جوڑنے کے لیے ایک اسٹریٹجک نوعیت کا منصوبہ ہے۔
افتتاحی تقریب کے بعد وزیر اعظم مودی بذریعہ ٹرین کٹرا کا سفر کریں گے، اس دوران وہ انجی کھڈ پر بھارت کے پہلے کیبل اسٹے ریلوے پل کا بھی معائنہ کریں گے۔ اس موقع پر وہ ریلوے انجینئروں اور اس عظیم منصوبے کی تکمیل میں کردار ادا کرنے والے ریٹائرڈ افسران سے ملاقات بھی کریں گے۔
کٹرا جو ماتا ویشنو دیوی کے یاتریوں کا مرکزی پڑاؤ ہے میں وزیر اعظم دو نئی وندے بھارت ٹرینوں کو جھنڈی دکھا کر روانہ کریں گے: ایک کٹرا سے بارہ مولہ اور دوسری بارہ مولہ سے کٹرا۔ اس اقدام کو کشمیر ریل کاریڈور کی مکمل آپریشنل تیاری کی علامت کے طور پر دیکھا جا رہا ہے۔ تاہم، حکام نے واضح کیا ہے کہ فی الحال کشمیر آنے اور جانے والے مسافروں کو کٹرا پر ٹرین تبدیل کرنا ہو گا۔
رسمی افتتاح کے بعد وزیر اعظم کشمیر میں ایک عوامی جلسے سے خطاب بھی کریں گے۔
واضح رہے کہ وزیر اعظم کو یہ ریلوے لنک اپریل میں ہی قوم کے نام وقف کرنا تھا، لیکن اس تقریب کو ملتوی کر دیا گیا تھا۔
